Description
Við setjum nesti í poka, reimum á okkur gönguskóna og hengjum myndavélina utan um hálsinn því við erum á leiðinni í sannkallaða 2 fyrir 1 ferð!
Við ætlum að hefja daginn við Landmannahelli og ganga þar á hæsta tind svæðisins, Löðmund. Hann er 1.077m hár og býður upp á stórkostlegt útsýni yfir nærsveitir. Þetta er sannkölluð útsýnisferð, um 10km löng með 600m hækkun. Gangan mun taka okkur um 4 klst.
En við ætlum ekki að stoppa þar heldur setjast aftur upp í bílana okkar og keyra til baka að Rauðfossakvísl. Frá bílastæðinu þar göngum við að Rauðfossi, meðfram Rauðfossakvísl og alla leið að Auganu fræga. Þessu magnaða fyrirbæri þar sem tæra vatnið streymir beint upp úr jörðinni og myndar fallegt, rautt auga. Þessi ganga er mjög þægileg, um 10km löng með 300m hækkun. Hún mun taka okkur um 4 klst.
Hér á ferðinni er því geggjaður hálendisdagur þar sem við munum upplifa allt það besta sem svæðið hefur upp á að bjóða.
Ferðin hefst við Landmannahelli og koma þátttakendur sér sjálfir þangað á einkabílum. Fært er öllum jepplingum á svæðinu og aðeins eitt vað er á leiðinni.
Nánari upplýsingar eru veittar með tölvupósti á netfanginu info@afstad.com eða í síma okkar 790 2800.
Innifalið:
-Leiðsögn
Verð : 12.900kr
Sendur er reikningur á þátttakendur og telst sæti frátekið þegar hann er greiddur.
Nánari upplýsingar um útbúnað, fyrirkomulag og dagskrá eru sendar með staðfestingarpósti.
Vertu í bandi – spurðu – komdu með!
